حوار بين حفيده وجدتها سنه 2085

الزمان يوم من أيام صيف عام2052
حفيدة في سن المراهقة12سنه تجلس مع جدتها70 سنة ويدور بينهما هذا الحوار
--------------------------------------------------- ------
الحفيدة- ازيك يا تيتة ميرو بقى لى كتير ماقعدتش معاكى
الجدة- وهو أنا عارفة أتلم عليكي خالص ده أنا قاعدة زهقانة قوي ومش لاقية حاجة تسليني
الحفيدة- ومابتفتحيش الدش ليه يا تيته
الجدة- التليفزيون بقى ممل خالص مافيهوش غير9700محطة بس وأنا كمان ما بعرفش أغير المحطات
الحفيدة- وإيه الحلاوة دي حلو البادي اللي انتي لابساه ده بس ده موضة قديمة قوي ياتيتة
الجدة- يا بنتي أنا ست دقة قديمة وبالبس زي ما جيلنا الصاعد اتعود وحسب التقاليد القديمة بتاعتنا
الحفيدة- أيوه بس مش حاسة إنك مخنوقة وانتي لابساه
الجدة- أبدا ده هو ده اللبس المحتشم اللي مفروض الكل يلبسه ويحافظ عليه فين أيام زمان لما كنا نلبس البادي اللي مبين البطن والظهر بس مع البنطلون السترتش الجلد كانت حاجة آخر روشنة
الحفيدة- ياه يا تيته ده انتوا كان ليكم تقاليد غريبة خالص
الجدة- وهو انتي فاكرة إن أيامكم دي أيام يا بنتي أيامكم دي ما يعلم بيها إلا ربنا فين أيام سنة 2002 هي الواحدة فينا كانت تستجري تشرب سيجارة البانجو ولا تسحب لها سطر بودرة قدام أبوها طب ده الدنيا كانت تتقلب ساعتها وما تتعدلش كان فيه حاجة اسمها اخلاق امال ايه
الحفيدة- معقول يا تيته للدرجة الفظيعة دي
الجدة- أمال انتي فاكرة إيه يعني وبعدين كانت الست من دول ما تلبسش اللبس الخليع بتاع اليومين دول الجيبة كان حسبي الله ونعم الوكيل وكانوا الستات يلبسوا فوقيها بلوزة باستمرار مش زي دلوقتى مايقلش طولها عن شبر وربع
الحفيدة- يا خبر وإيه كمان ياتيته
الجدة- ح أقول لك إيه ولا إيه يعني خدي عندك مثلاً زمان كنا نسمع الطرب الأصيل لمطربين حقيقيين زي مصطفى قمر وعمرو دياب وطبعاً كانت سيدة الغناء شاكيرا وكانت الأغنية مدتها أكثر من دقيقتين متواصلين من الطرب الأصيل والموسيقى الهادية الراسية اللي تعمر النافوخ بصحيح كانوا مطربين روشين وآخر طحن حسبي الله ونعم الوكيل
الحفيدة- وبعدين ياتيته
الجدة- وبعدين كنا نسمع على حاجة اسمها اسطوانات ليزر ودي صحيح انقرضت بس كان ليها طعم عن دلوقتي و يا سلام لما كنا نحطها في الووكمان ونعلقها في حزام البنطلون كده ونمشي في الشارع كده كانت أيام جميلة حسبي الله ونعم الوكيل
الحفيدة- هاه يا تيته و بعدين
الجدة- أحلى أيام بقى كانت أيام الدراسة الفصل كان على أيامنا رايق وعدد التلاميذ فيه ما يزيدش عن ستين سبعين تلميذة وكنا ساعتها بنعرف نفهم الدرس كويس مش زي دلوقتي وكانت الشوارع أيامها فاضية يعني كانت إشارة المرور تقعد ساعة إلا ربع بس لأن مصر كلها كان تعدادها70 مليون مش أكثر تخيلي بقى الروقان اللي كنا فيه حسبي الله ونعم الوكيل
الحفيدة-70 مليون بس
الجدة- أمال إيه عشان كده كانت كل حاجة رخيصة يعني مثلاً كيلو اللحمة يوم ما يضربه الدم كان يبقى بخمسةوعشرين أو بتلاتين جنيه وكان أتخن جوز جزمة بـ 250جنية وكان الواحد يقدر يشتري شقة تمليك بـ150 ألف جنيه بس وكان الدولار بسبعة جنيه بس تخيلي بقى
الحفيدة- ما هو علشان كده الجواز على أيامكم كان سهل خالص إحنا بقى خلصنا من العُقد دي
الجدة- أُمال إيه ده احنا الواحدة مننا كانت بمجرد ما توصل سن17 سنة تبتدي تفكر في الجواز العرفى على طول وما كانش عندنا الأفكار الغريبة اللي بتعملوها دلوقتي أنا شخصياً شايفة إن ده أوفر شوية ده احنا يا بنتي على أيامنا كان لا يمكن البنت تتأخر بره البيت عن الساعة أربعة صباحاً طب ده باباها كان ممكن ساعتها يخاصمها
الحفيدة- ياي ده انتوا كنتوا متزمتين خالص ياتيته
الجدة- يا بنتي إحنا اتربينا على الأخلاق والفضيلة والعادات والتقاليد يعنى كان أهل الفن محتشمين جداً وكانوا دايماً يطلعوا بالمايوهات البيكيني والمذيعات كانوا يقعدوا جنب الضيف مش على ركبته زي دلوقتي هيـ يـ يـ يــه الله يرحم فكرتيني بالذي مضى حسبي الله ونعم الوكيل دي أيام
- تمسك الجدة بتليفون محمول في حجم علبة الكبريت -
الحفيدة- هتكلمي مين يا تيته
الجدة- الحقيقة أنا كنت موصية الجزار على اتنين كيلو لحمة واديته600 دولار عربون وعايزة أطلبه أشوف إذا كانت اللحمة وصلت ولا لأ
الحفيدة تنهض من مكانها- تشاو سي يو تيته
الجدة- سي يو
و في المساء
الحفيدة تضغط الريموت كنترول لنرى شاشة كبيرة بطول وعرض حائط الغرفة وتظهر صوت مذيعة مصحوبا بلقطات للأنباء تقول-
المذيعة- هاي شلة إليكم عناوين الأخبار
- أمريكا ترصد 25مليار دولار لرأس تامر بن محمد بن أسامة بن لادن المتهم الأول في تفجير قصر السفير الأمريكي في أفغانستان
- واشنطن تتهم ليبيا بتفجير سفينة فضاء فوق كوكب المريخ
- د/ميدو يوسف والى وزير الزراعة يفتتح النادى الصهيونى العاشر
- د/ فريد يوسف بطرس غالي وزير الاقتصاد يصرح أن إعدام الفقراء هو الحل لخروجنا من عنق الزجاجة
- موافقة مجلس الشعب أخيرا على خصخصة معبد الكرنك
-- أخبار عربية --
- نجلاء ياسر عرفات تطالب بانسحاب إسرائيل حتى حدود عام 2030 وإعلان الدولة الفلسطينية في مايو المقبل
- سيريلانكا والفلبين تطرد خمسة آلاف خادمة كويتية
- إسرائيل ترفض الإنسحاب من البصرة إلا بعد ضمان أمن مستوطناتها في بغداد
- اشتباكات على الحدود الإسرائيلية المغربية
-- أخبار الفن --
- رئيس قطاع الإنتاج لم يستقر بعد على بطلة فوازير رمضان ويعقد إجتماع مع السيدة توتي محمد صفوت الشريف وزيرة الإعلام الجديدة لمناقشة هذه القضية
- الفنان محمد هنيدي يهاجم نجوم الكوميديا الجدد
- زفاف المطربة صباح على حفيد الفنان الراحل راغب علامة
المذيعة- فينيش باى

الجدة : لأ بقى حسبي الله ونعم الوكيل فيكم فعلا(يغمى عليها)

الحفيدة : تيته..تيته إيه دا ؟.. دي ماتت ....
منقول